ຈັບມາກວດສອບແລ້ວ..!!! ຊາວຈີນ 2 ຄົນ ໃຊ້ອຸປະກອນບັນທຶກຂໍ້ມູນ ຕາມຕູ້ ATM


ມີການລາຍງານຜ່ານສື່ສັງຄົມອອນລາຍ ຫວ່າງບໍ່ດົນນີ້ວ່າ: ຕໍາຫຼວດໄດ້ຈັບຊາວຈີນທີ່ມາປຸ້ນຄົນລາວ ກໍາລັງກົດເງິນຈາກຕູ້ເອທີເອັມ ຕໍ່ໜ້າສະໜາມກິລາຫຼັກ 2 ນະຄອນປາກເຊ ແຂວງຈໍາປາສັກ.
ເຫດການດັ່ງກ່າວ, ເຈົ້າໜ້າທີ່ ປກສ ແຂວງຈໍາປາສັກ ໄດ້ລາຍງານວ່າ:





ໃນວັນທີ 8 ມິຖຸນາ 2019, ເຈົ້າໜ້າທີ່ກອງພັນປ້ອງກັນເຄື່ອນທີ່ ກອງບັນຊາການ ປກສ ແຂວງຈໍາປາສັກ ໄດ້ຈັບຊາວຈີນ 2 ຄົນ ທີ່ເຄື່ອນໄຫວຕິດຕັ້ງອຸປະກອນບັນທຶກເອົາເລກລະຫັດບັດເອທີເອັມ ຢູ່ຕາມຕູ້ເອທີເອັມຂອງທະນາຄານການຄ້າຕ່າງປະເທດລາວ ມະຫາຊົນ ສາຂາແຂວງຈໍາປາສັກ ຢູ່ຈຸດບ້ານທ່າຫຼວງ ນະຄອນປາກເຊ ກ່ອນສົ່ງໃຫ້ ພະແນກສືບສວນ-ສອບສວນ ປກສ ແຂວງ ດໍາເນີນການສືບສວນ-ສອບສວນ.




ຜູ້ຖືກຫາທັງ 2 ຄົນຊື່: ທ້າວ ຫູຮາຍປຽວ ອາຍຸ 50 ປີ ແລະ ທ້າວ ຊຽວຈິງຊານ ອາຍຸ 32 ປີ ເຊິ່ງທັງ 2 ຄົນແມ່ນຄົນເຊື້້ອຊາດ-ສັນຊາດຈີນ ຢູ່ບ້ານເລີຍຈິນ ເມືອງການໂຈ ແຂວງຈຽງຊີ ປະເທດຈີນ.



ພະແນກຕໍາຫຼວດສືບສວນ-ສອບສວນ ຫ້ອງຕໍາຫຼວດ ປກສ ແຂວງຈໍາປາສັກ ໃຫ້ຮູ້ວ່າ:
ໃນວັນທີ 7 ມິຖຸນາ 2019, ພະນັກງານທະນາຄານການຄ້າຕ່າງປະເທດລາວ ມະຫາຊົນ ສາຂາແຂວງຈໍາປາສັກ ພ້ອມກັບ ເຈົ້າໜ້າທີ່ຕໍາຫຼວດ ກອງພັນປ້ອງກັນເຄື່ອນທີ່ ປະຈໍາຢູ່ທະນາຄານອອກກວດຕູ້ເອທີເອັມ ຢູ່ບ້ານໂພນກຸງ ນະຄອນປາກເຊ ແຂວງຈໍາປາສັກ ພົບເຫັນຮ່ອງຮອຍການງັດແງະຝາອັດເລກລະຫັດບັດເອທີເອັມ, ຈຶ່ງໄດ້ລາຍງານໃຫ້ ເຈົ້າໜ້າທີ່ກໍາລັງຕໍາຫຼວດວິຊາສະເພາະ ເພື່ອຕິດຕາມກວດກາຫາເປົ້າໝາຍ.
ຜ່ານການດຳເນີນການຕິດຕາມຫາຄົນຮ້າຍ, ຮອດເວລາປະມານ 14:30 ໂມງ ຂອງວັນທີ 8 ມິຖຸນາ ໄດ້ພົບເຫັນຊາຍ 2 ຄົນ ຂັບຂີ່ລົດຈັກໄປຈອດຢູ່ຕໍ່ໜ້າຕູ້ເອທີເອັມ ຢູ່ເຂດບ້ານທ່າຫຼວງ ນະຄອນປາກເຊ ຈຶ່ງໄດ້ເຂົ້າຈັບຕົວພວກກ່ຽວທັງສອງຄົນ ພ້ອມເຄື່ອງມືທີ່ນໍາໃຊ້ເຂົ້າໃນການກໍ່ເຫດ ເພື່ອນໍາໄປສອບສວນ.



ອຸປະກອນທີ່ໃຊ້ໃນການໂຈລະກຳຂໍ້ມູນບັດເອທີເອັມ ຜ່ານການສອບສວນ, ພວກກ່ຽວສາລະພາບ ວ່າ:


ໃນວັນທີ 1 ມິຖຸນາ 2019, ໄດ້ພາກັນເຂົ້າມາປະເທດລາວ ດ້ວຍເຮືອບິນມາລົງສະໜາມບິນວັດໄຕ ນະຄອນຫຼວງວຽງຈັນ ແລ້ວມຸ່ງໜ້າລົງໄປ ນະຄອນປາກເຊ ເພື່ອຈະເຄື່ອນໄຫວລັກເອົາຂໍ້ມູນຢູ່ຕາມຕູ້ເອທີເອັມ ຂອງທະນາຄານການຄ້າຕ່າງປະເທດລາວ ມະຫາຊົນ ສາຂາແຂວງຈໍາປາສັກ.
ພາຍຫຼັງທີ່ໄປຮອດ ນະຄອນປາກເຊ ໄດ້ໄປພັກຢູ່ໂຮງແຮມແຫ່ງໜຶ່ງ ຢູ່ບ້ານທ່າຫຼວງ ແລະ ພາກັນໄປເຊົ່າລົດຈັກ ເພື່ອຈະໃຊ້ກໍ່ເຫດ ໂດຍການຂັບຂີ່ເລາະສັງເກດເບິ່ງຕູ້ເອທີເອັມຂອງທະນາຄານດັ່ງກ່າວ.ຈາກນັ້ນ, ເວລາປະມານ 18:00 ໂມງ ຂອງວັນທີ 6 ມິຖຸນາ 2019 ໄດ້ພາກັນຂີ່ລົດຈັກທີ່ເຊົ່າມານັ້ນ ໄປທີ່ຕູ້ເອທີເອັມຂອງທະນາຄານການຄ້າ ເຊິ່ງຕັ້ງຢູ່ບ້ານໂພນກຸງ.



ຂອງກາງທີ່ກວດພົບ ຈາກໂຮງແຮມຂອງຜູ້ຖືກຫາ


ເມື່ອໄປຮອດ, ທ້າວ ຫູຮາຍປຽວ ກໍ່ມ້າງຝາອັດເລກລະຫັດບັດອອກ ແລ້ວເອົາເຄື່ອງບັນທຶກຂໍ້ມູນສຽບໃສ່ທາງກ້ອງ ແລ້ວອັດຝາໄວ້ຄືນ ເພື່ອບັນທຶກເອົາເລກລະຫັດບັດເອທີເອັມ ເວລາທີ່ມີຄົນມາໃຊ້ບໍລິການຕູ້ດັ່ງກາວ ແລ້ວເອົາໄປກໍ່ໂຈລະກໍາກົດເອົາເງິນຕາມຕູ້ເອທີເອັມ. ຮອດເວລາປະມານ 21:00 ໂມງ ຂອງວັນດຽວກັນ ຈຶ່ງກັບໄປຖອດເອົາເຄື່ອງບັນທຶກຂໍ້ມູນດັ່ງກ່າວອອກ ແລ້ວກັບໄປບ່ອນພັກ ເຊິ່ງພວກກ່ຽວເຮັດແບບນີ້ແລ້ວຫຼາຍຈຸດ.
ເວລາ 14:30 ໂມງຂອງວັນທີ 8 ມິຖຸນາ 2019, ທ້າວ ຫູຮາຍປຽວ ແລະ ທ້າວ ຊຽວຈິງຊານ ໄດ້ກັບໄປຖອດເອົາເຄື່ອງບັນທຶກຂໍ້ມູນ ທີ່ໄດ້ເອົາໄປສຽບໃສ່ຕູ້ເອທີເອັມ ຢູ່ຈຸດບ້ານທ່າຫຼວງ ນະຄອນປາກເຊ ກ່ອນໜ້ານັ້ນອອກ. ແຕ່ໃນເວລາດັ່ງກ່າວ, ກໍຖືກເຈົ້າໜ້າທີ່ຕໍາຫຼວດ ກອງພັນປ້ອງກັນເຄື່ອນທີ່ ກັກຕົວ ແລະ ສົ່ງໃຫ້ ພະແນກຕໍາຫຼວດສືບສວນ-ສອບສອບ ປກສ ແຂວງຈຳປາສັກ ດໍາເນີນການສືບສວນສອບສວນ ຕາມຂັ້ນຕອນຂອງກົດໝາຍ.



ປັດຈຸບັນ, ຄະດີດັ່ງກ່າວ ຍັງຢູ່ໃນຂັ້ນຕອນດໍາເນີນການສືບສວນ-ສອບສວນຂະຫຍາຍຜົນ ຂອງ ເຈົ້າໜ້າທີ່ຕໍາຫຼວດ ຕື່ມອີກ.

ທີ່ມາ: ນສພ ປ້ອງກັນຄວາມສະຫງົບ
----------------

ລາວ ไทย: ຮັກກັນໄວ້ເດີ พี่น้อง






No comments:

Powered by Blogger.